《唔講你知唔知？》
過去一星期，實在要同老細講聲唔好意思，因為除咗啲urgent嘢趕住俾老細外，其餘時間我隻手不受控制地每5分鐘望一次個電話，隔住個mon都睇到我心如刀割……
一有行動，就算喺公司我都趕緊開live嚟睇。
越睇，心越梗；越心梗，越強忍。
忍眼淚忍得我自己眼蓋定眼袋腫到都分唔清。
痛，
痛曾繁榮昌盛舉世聞名嘅香港變得滿地磚瓦。
痛因為爭取自由而犧牲了的生命。
痛有二百萬人行出嚟，因為大家已被迫到埋牆角，已經冇嘢再可以輸。
若然一班守護自己家園走出嚟行嘅人係廢青，
難道我遠嫁意大利流浪非洲嘅就係崇高傑青？
好多人以為我嫁咗去意大利就走運因為可以選擇唔洗留喺香港，我想話我越離開香港日子夠耐，越發覺事實並非如此。
唔講你知唔知？喺意大利如果有賊入屋，屋主自衛而襲擊個賊會被判罪坐監，間屋順理成章歸個賊所有。喺埃及你唔會見到有人示威遊行，因為試圖表達意見者，唔洗等下個日出已經人間蒸發。曾經喺北京住咗大半年，我諗唔洗多講大家都明。至於上年喺阿根廷，令人噴飯嘅係當地人每星期搞遊行當去旅行，帶埋mate壺（馬黛茶）同桶裝啤酒，街頭巷尾都有asado(烤肉)的在叫賣。都唔知係有雞先定有蛋先，高官一於賴理，你有你喊叫，政府有政府繼續穿櫃桶底拉低貧窮線。
不論什麼立場，縱使只睇多國多台嘅新聞報導，我咁大個女從來未見過有比率咁高嘅市民遊行仲要冇縱火，冇汽油彈，冇搶劫。只見每當有救護車或巴士要駛經時，秒分紅海；只見遊行完咗仲有人去執返自己嘅垃圾；只見就為自己家園而行亦冇忘記為地球出一分力將垃圾膠樽分類。天啊！請話我知哪有一個地方嘅人比香港人更可愛？哪有一個民族比香港人更值得驕傲？香港未必係全球最佳居住地，但住過不同國家嘅我可以講，香港實在有太多值得人愛嘅地方。
眾志成城，團結一致，這就是香港!
立場不同，但仍可共融，這就是香港!
百萬人遊行，都不忘執垃圾，這就是香港!
天外有天，闖出香港，的確所見所聞實在令我增廣見聞。但同Do姐一樣，每程上機落機，最期待的，始終都係返香港嗰程。因為 #我愛香港 #ILoveHK
#我為香港人而驕傲 #IamProudofHongKong
圖:意佬每次返香港都好喜歡行嘅女人街
Search